‘A STRINA ‘E SDEGNU

‘U tempu de la strina è venutu
a nume du campusantaru ve salutu.
    Cantu la strina e la cantu a lassa e piglia
    se distruggissi tutta la famiglia.
Ste feste granne ‘e passamu cantannu
me spagnu ca ‘u’ d’arrivi a Capudannu.
    Alla mugliere ‘a ‘mintimu ‘e chianu
    cce fa la cumpagnia ‘u sacristanu.
Sentu lu strusciu de la cascitella
chi ve rimani sketta ‘a figliuella.
    Sentu lu strusciu de lu tavulatu
    allu figliu ‘u via ‘nu sfurtunatu.
Cantu ma la porta è sempre chiusa
chista è la nanna ca è ‘na guallarusa.
    Allu nannu ppe mo ‘u lassamu stare
    dumane cce facimu ‘u funerale.
Aju pregatu tantu a Santu Roccu
me spagnu ca te mora puru ‘u porcu.
    Ohi ca ha fattu ‘a nive allu Spinitu
    chi ‘u vinu novu se facissi acitu.
Dintra sta casa cc’è natu ‘nu gigliu
chi vo chiancere a chistu munnu e a chillu.
    Dintra sta casa cc’è natu ’nu jure
    chi ‘u’ vo videre cchiù ‘u lustru du purtune.
Cantu la strina e la cantu a rasa rasa
chi vo perdere puru ‘a via da casa.
    Chista è la strina nostra ‘un cce chi fare
chi vo jire allu lettu e nun t’azare.
    Aju cantatu chi me doa lu collu
    chi prestu t’arrivi ‘nu storciacollu.
Simu venuti sulu ppe cantare
chi vo videre ‘u pane e suspirare.
    Chi vo jettare ‘u sangue cati cati
    quantu curra Savutu ccu lu Crati.
Aju pregatu tantu a santu Ricu
avissi ‘e ‘mpassuare cumu ‘a ficu.
    Ohi ca ha fattu ‘a nive a Ursara
    chi prestu te coglissinu ccu la pala.
Cantu la strina ca ‘u de vrigogna
chi prestu te chiamassi la Madonna.
    ‘A strina porta sempre allegria
    chi te venissi mo ‘na malatia.
‘A strina porta pace ad ogne rasa
trasissi ‘nu tavutu ‘ntra sta casa.
    ‘U’ na fattu vivere e mancu mangiare
    chi vo videre ‘e vie e ‘u’ le putire caminare.
Stu palazzellu lu giramu ‘ntornu
chi vo fa stanotte l’urtimu sonnu.
    Canta lu gallu e scotula le pinne
    disgrazie, malatie e jamuninne.
Canta lu gallu e scotula la cuda
‘nu granne storciacollu a vua signura.